Ríkisstjórn Grikklands vill ná samkomulagi við Evrópusambandið og Alþjóðagjaldeyrissjóðinn sem fyrst, helst fyrir lok mánaðarins, um lánafyrirgreiðslu. Það styttist óðum í að Grikkir verði uppiskroppa með fé.
Þeir þurfa að greiða Alþjóðagjaldeyrissjóðnum 1,5 milljarða evra hinn 5. júní næstkomandi, að því er segir í frétt breska ríkisútvarpsins.
Gabriel Sakellaridis, talsmaður ríkisstjórnarinnar, sagði í dag að það væri nauðsynlegt að ná samkomulagi strax.
Fyrir rúmri viku viðurkenndu stjórnvöld í Grikklandi að þau hefðu gripið til þess að taka fé úr neyðarsjóðum til þess að greiða af láni til Alþjóðagjaldeyrissjóðsins og koma þar í veg fyrir að ríkinu verði gert að yfirgefa evrusamstarfið vegna fjárskorts.
Alþjóðagjaldeyrissjóðurinn og ESB hafa lagt áherslu á að ljúka samningaviðræðum við Grikki áður en ákvörðun verði tekin um að veita þeim frekari lán upp á 7,2 milljarða evra.