Barack Obama ætlar að tala hreinskilningslega um réttindi samkynhneigðra við leiðtoga Afríkuríkja. Hann er nú á leið til Kenía en þangað á hann ættir sínar að rekja.
„Ég er ekki aðdáandi misréttis og ofbeldis á grundvelli kynþáttar, trúar, kynhneigðar eða kyns,“ segir Obama við BBC.
Hann mun einnig ræða um baráttuna gegn uppgangi öfgamanna á ferð sinni um Austur-Afríku. Hryðjuverkasamtökin Al Shebab hafa ítrekað gert mannskæðar árásir í Kenía vegna veru keníska hersins í Sómalíu.
Obama er nú á leið til Kenía í sinni fyrstu heimsókn þangað síðan hann var kjörinn forseti. Hann mun einnig verða fyrsti forseti Bandaríkjanna til að ávarpa Afríkuráðið en það mun hann gera í Eþíópíu á sunnudag.