Forsætisráðherra Grikklands, Alexis Tsipras, varði í dag ákvörðun fyrrverandi fjármálaráðherra landsins, Yanis Varoufakis, sem lét gera áætlun um útgöngu Grikkja af evrusvæðinu, Grexit. Höfða á einkamál gegn Varoufakis vegna þess.
„Að sjálfsögðu gaf ég persónulega fyrirskipun um að setja saman teymi sem myndi annast gerð áætlunar ef nauðvarnar kæmi,“ segir Tsipras. Hann tjáði þingheimi í dag að ef lánadrottnar Grikkja voru að undirbúa brotthvarf Grikklands út úr evrusamstarfinu (Grexit) - þá hefði verið eðlilegt að Grikkir undirbyggju vörn sína.
Höfðað hefur verið einkamál gegn Varoufakis þar sem því er haldið fram að hann hafi á laun verið að undirbúa brotthvarf Grikkja. Hæstiréttur hefur sent málið til gríska þingsins sem hefur eitt heimild til þess að ákvarða um hvort höfða megi mál gegn fyrrverandi ráðherra með formlegum hætti.
Tsipras segir að Varoufakis hafi kannski gert mistök en ekki ætti að höfða mál gegn honum.
„Þú getur ekki sakað hann um að hafa stolið peningum frá grísku þjóðinni eða að hafa á laun undirbúið brotlendingu landsins,“ sagði Tsipras á þingi í dag.
Ráðherrann fyrrverandi hefur viðurkennt að lögð hafi verið drög að hliðstæðu greiðslukerfi ef til þess kæmi að ríkinu yrði sparkað úr evrusamstarfinu. Hann sagði að það hefði verið kæruleysi af sinni hálfu ef hann hefði ekki undirbúið „plan B“.
Samkvæmt Varoufakisi var greiðslukerfinu ætlað að brúa bil þar til hægt yrði að taka drökmuna aftur í notkun. Hann neitaði því hins vegar að hópurinn sem vann að þessari áætlun hefði starfað utan stjórnarinnar og á skjön við lög.
„Starfshópur fjármálaráðuneytisins starfaði eingöngu innan ramma stjórnvaldsstefnunnar og ráðleggingar hans miðuðu ávallt að því að þjóna almannahagsmunum, að virða lög landsins og að halda landinu innan evrusvæðisins,“ segir í tilkynningu frá Varoufakis.