Eflaust kannast margir við þá yndislegu tilfinningu sem fylgir því að leggja sig um miðjan dag. Koma heim úr skóla eða vinnu og hlamma sér upp í sófa og hvíla lúin bein.
Oft hefur verið litið á þetta sem leti en samkvæmt nýrri rannsókn sem kynnt var á ráðstefnu hjartalækna í London getur „blundur á dag“ lækkað blóðþrýstinginn og minnkað líkurnar á því að fólk fái hjartaáfall. Independent greinir frá þessu.
Rannsakendur sáu að þeir sem lögðu sig voru með 5% lægri blóðþrýsting að meðaltali en þeir sem lögðu sig ekki.
Rannsóknin fann einnig tengingu á milli þess hversu lengi fólk lagði sig og háþrýstings. Þeir sem lögðu sig í klukkutíma voru með besta og heilbrigðasta blóðþýstinginn.
„Að leggja sig um miðjan dag eru nánast forréttindi í nútímanum vegna vinnuálags og lítils tíma sem fólk hefur. Rannsóknin okkar bendir á að góður blundur lækkar ekki aðeins blóðþrýsting, heldur eru lengri lagningar jafnvel enn betri fyrir fólk,“ sagði Manolis Kallistratos, hjartasérfræðingur, sem stjórnaði rannsókninni.