Sadiq Khan hefur verið kjörinn næsti borgarstjóri Lundúna. Þetta var staðfest nú í kvöld og bar Kahn sigurorð af Zac Goldsmith borgarstjóraefni Íhaldsmanna.
Khan er þingmaður og fyrrverandi ráðherra Verkamannaflokksins. Hann er sonur strætóbílstjóra frá Pakistan er fyrsti músliminn til að gegna embætti borgarstjóra í evrópskri höfuðborg.
Kjör hans þykir, að sögn fréttavefjar BBC, ákveðinn sigur fyrir Verkamannaflokk Jeremy Corbyns, eftir slælega útkomu flokksins í sveitarstjórnarkosningunum í Skotlandi þar sem hann tapaði hluta þingsæta sinna.
Khan verður þriðji borgarstjóri Lundúna, en hann tekur við af íhaldsmanninum litríka Boris Johnson, sem verið hefur borgarstjóri í Lundúnum frá því 2008.