Afhjúpun Panama-skjalanna er í raun birtingarmynd deilna bak við tjöldin milli stórra valdhafa í heiminum. Þar spilar pólitík stóran sess og rétt væri fyrir þessi lönd að heyja baráttuna heima fyrir en ekki í Panama. Þetta sagði Juan Carlos Varela, forseti Panama, fyrr í dag rétt áður en Alþjóðasamtök rannsóknarblaðamanna, ICIJ, opnuðu fyrir aðgang að upplýsingum um 200 þúsund aflandsfélög sem panamíska lögfræðistofan Mossack Fonseca kom að.
„Það sem ég tel ekki vera gott er þegar stórir valdhafar sem vilja berjast nota Panama sem vígvöll,“ sagði Varela og bætti við: „Ef þeir vilja berjast ættu þeir að gera það í eigin löndum en ekki nota fjármála- og efnahagskerfi okkar.“
Sagði Varela að yfirvöld í Panama væru búin undir hvaðeina sem kæmi í ljós í kvöld þegar skjölin yrðu birt og bætti við að skjölin væru vandamál alþjóða fjármálakerfisins en ekki vandamál Panama. „Þetta er alheimsvandi,“ sagði hann.