Norðurkóreski herinn skaut í dag tveimur skotflaugum í tilraunaskyni í trássi við bann Sameinuðu þjóðanna, samkvæmt upplýsingum frá yfirvöldum í Suður-Kóreu.
Talið er að fyrra skotið hafi misheppnast, en sú flaug lenti í sjónum eftir um 150 km ferðalag.
Seinni flaugin flaug um 400 km leið, en báðar skotflaugarnar voru að sögn yfirmanna í suðurkóreska hernum Musudan-flaugar í millistyrk.
Hafi seinna skotið heppnast þá er það stórt skref fram á við fyrir hervæðingu Norður-Kóreu sem hefur í fjórgang misheppnast að senda slík tilraunaskot á undanförnum mánuðum.
Fréttavefur BBC segir yfirvöld í Suður-Kóreu og Bandaríkjunum rannsaki nú ýtarlega seinna skotið og hvort það teljist hafa heppnast.
Norður-Kórea vinnur að því að koma upp eigin kjarnavopnum þó að samþykkt Sameinuðu þjóðanna kveði á um að ríkið megi ekki nota neinar gerðir skotflauga.
Utanríkisráðuneyti Bandaríkjanna hefur fordæmt skotin í dag og segir talsmaður ráðuneytisins, John Kirby, tilraunir Norður-Kóreumanna eingöngu til þess fallnar að auka þrýsting á að stöðva vopnavæðingu landsins.