Þingmenn Repúblikanaflokksins saka ríkisstjórn Baracks Obama, forseta Bandaríkjanna, og Hillary Clinton, fyrrverandi utanríkisráðherra Bandaríkjanna, um að hafa mistekist að vernda bandaríska sendiráðsfulltrúa í árásinni á ræðismannsskrifstou Bandaríkjanna í líbísku borginni Benghazi árið 2012.
Fjórir Bandaríkjamenn létu lífið í árásinni, þar á meðal sendiherra Bandaríkjanna í Líbíu.
Í nýrri 800 blaðsíðna skýrslu sem rannsóknarnefnd fulltrúadeildar Bandaríkjaþings gerði og birt var í dag eru Clinton, sem er nú forsetaefni Demókrataflokksins, og starfslið hennar jafnframt sökuð um að hafa neitað að svara spurningum nefndarinnar. Það sé skammarlegt.
Notkun hennar á persónulegu netfangi sínu, á meðan hún gegndi embætti utanríkisráðherra, í stað opinbers tölvupóstsaðgangs, er einnig harðlega gagnrýnd í skýrslunni.
Þó kemur ekkert fram í skýrslunni sem bendir til þess að Clinton hafi viðhaft saknæma háttsemi í tengslum við árásina.
Bandarísk stjórnvöld eru einnig gagnrýnd fyrir að hafa ekki gert sér grein fyrir hvernig öryggismálum var háttað í Benghazi. Vítavert hafi verið að halda úti skrifstofum þar á meðan öryggi starfsfólksins væri ekki tryggt.
Skýrslunnar hefur verið beðið með eftirvæntingu, en rannsóknin er ein sú tímafrekasta og jafnframt umdeildasta í sögu bandarískra stjórnmála.
Talið er líklegt að repúblikanar muni nota niðurstöður skýrslunnar til þess að koma höggi á Clinton fyrir forsetakosningarnar í nóvember.
Þingmenn Repúblikanaflokksins í fulltrúadeild þingsins höfðu yfirumsjón með rannsókninni á árásinni. Starfaði rannsóknarnefndin í um tvö ár, að því er fram kemur í frétt Reuters.