Skaut 13 ára dreng til bana
Setja bókamerki
Þrettán ára gamall svartur drengur var skotinn til bana af hvítum lögreglumanni í Ohio-ríki í vikunni. Pilturinn á að hafa tekið loftbyssu upp úr buxnastreng sínum þegar hann var handtekinn í tengslum við vopnað rán. Yfirvöld í Ohio biðja almenning um að halda ró sinni á meðan málið er rannsakað en lögreglumaðurinn hefur verið sendur í leyfi.
Samkvæmt fréttum BBC og New York Times var lögreglan kölluð út vegna vopnað ráns miðborg Columbus í Ohio-ríki þegar lögreglumennirnir sáu þrjá unga menn sem svipaði til lýsingar á ræningjunum sem fórnarlambið hafði gefið lögreglu. Alls var ránsfengurinn 10 Bandaríkjadalir, tæpar 1.200 krónur. Tveir mannanna hlupu í burtu en lögregla elti þá inn í húsasund. Þar, að sögn lögreglunnar, dró drengurinn, Tyree King, upp byssuna og skaut annar lögreglumannanna Tyree King ítrekað. Lögreglan segir að Tyre hafi verið með raunverulegt vopn, það er loftbyssu (BB gun), á sér. Tyree King var fluttur á sjúkrahús þar sem hann var úrskurðaður látinn.
Félagi Kings, sem var með honum í húsasundinu, var yfirheyrður og látinn laus. Þess þriðja er enn leitað.
Á blaðamannafundi í gær bað borgarstjórinn í Columbus, Andrew Ginther, borgarbúa um að halda ró sinni en hann hafði áður sagt að það væri eitthvað að í landi þar sem atburður sem þessi gerist. „Og þrettán ára gamall drengur er látinn í Columbus-borg vegna byssu- og ofbeldis þráhyggju okkar,“ sagði Ginther í gær.
Í símatali til neyðarlínunnar segir fórnarlambið að ránsfengurinn sé aðeins 10 dalir. Eins að vopnið sem þeir voru með líkist Ruger skammbyssu. Nokkrum mínútum síðar má heyra sírenur á bak við og svo heyrist sá sem hringdi segja: „Hann er að skjóta hann! ó guð minn góður.“
Lögreglustjórinn í Columbus, Kim Jacobs, segir að byssan liti næstum því alveg eins út eins og skammbyssa. Lögreglumaðurinn, Brian Mason, þrautþjálfaður lögreglumaður, hefur verið sendur í leyfi en samkvæmt skýrslum lögreglu skaut hann mann til bana árið 2012 en sá hélt manni í skotbardaga. Ekki þótti neitt óeðlilegt við það hvernig Mason brást við þar.
„Höfum ekki náð að skríða upp úr þeirri gryfju“
Kaldasti veturinn kom að óvörum
Mál hjúkrunarfræðingsins fer aftur fyrir héraðsdóm
Nemendur í HÍ reistu tjaldbúðir án leyfis
Gígbarmurinn hækkað frá því í gær
Bergnuminn í Hvalfirði
Banna mengandi búnað sem leyfður er á Íslandi