Lögregluyfirvöld í Bangkok réðust í dag inn í byggingu þar í borg og handtóku fimm erlenda einstaklinga eftir skotbardaga. Í íbúðinni fundu lögreglumenn skotvopn, metamfetamín, fölsuð vegabréf og lík falið í frystikistu.
Meðal handteknu voru þrír enskumælandi menn, vinnukona frá Búrma og eiginmaður hennar. Enn á eftir að staðfesta þjóðerni mannanna þriggja en fjölmiðlar í Bangkok segja tvo þeirra frá Bandaríkjunum og einn frá Bretlandi.
Einn mannanna greip skotvopn og skaut á lögreglu þegar hún réðist til atlögu á íbúðina. Lögreglumaður slasaðist í skotbardaganum.
Þegar komið var inn fannst sundurskorið lík í frysti á jarðhæð byggingarinnar. Fjölmiðlum var upphaflega tjáð af lögreglu að um væri að ræða konu en hún sagði síðar að líkið væri af ljóshærðum útlending.
„Líkami hans var bútaður sundur í sex parta með beittu áhaldi, settur í svartan ruslapoka og settur í frystinn,“ sagði lögreglustjórinn Sanit Mahathavorn.
Á vettvangi fundust einnig, eins og fyrr segir, fölsuð vegabréf, þrjár byssur og metamfetamín.
Lögregla telur að byggingin hafi verið notuð við vafasama iðju af erlendum glæpamönnum.