Fleira fólk hefur verið drepið í Brasilíu síðustu fjögur árin en á meðan á stríðinu í Sýrlandi hefur staðið undanfarin fimm ár.
Glæpatíðni hefur aukist í Brasilíu síðustu ár og hjálpar þar ekki mikil efnahagslægð og niðurskurður í útgjöldum til lögreglunnar víðsvegar um landið.
Samkvæmt hóp sem fylgist með almannaöryggi í Brasilíu voru tæplega 280 þúsund manns drepin í landinu á árunum 2011 til 2015.
Mannréttindavaktin í Sýrlandi segir að 256.124 manneskjur hafi verið drepnar á sama tíma í borgarastyrjöldinni í landinu.
Á síðasta ári voru rúmlega 58 þúsund manns drepin í Brasilíu. Talan nemur 28,6 af hverjum 100 þúsund manns, sem er mun hærra en hlutfallið 10 af hverjum 100 þúsund, sem Sameinuðu þjóðirnar miða við í tengslum við langvinnt ofbeldi sem erfitt er að stöðva.
Alls drápu lögreglumenn 3.345 manns í Brasilíu í fyrra en að sama skapi voru 393 lögreglumenn drepnir við skyldustörf.