Íraski herinn hefur náð yfirráðum á svæði í Mosul þar sem er að finna helgustu staði borginnar. Svæðið hefur verið á valdi vígamanna Ríkis íslams frá því árið 2014.
Fáni Íraks blaktir nú á ný á Nabi Yunus-svæðinu, þar sem m.a. er að finna forn grafhýsi. Tvö önnur hverfi í borginni eru nú einnig á ný undir yfirráðum íraskra stjórnvalda.
Nabi Yunus var byggt á svæði þar sem einn spámaður Kóransins, Yunus, eða Jónas, var grafinn. Svæðið hefur lengi verið fjölsótt af pílagrímum.
Í júlí árið 2014 náði Ríki íslams völdum á svæðinu við grafhýsið og sprengdi það í loft upp. Skemmdarverkin vöktu heimsathygli.
Ríki íslams hefur eyðilagt fleiri merkileg kennileiti í Mosúl og annars staðar í Írak.