Stephen O'Brien, yfirmaður mannúðar- og neyðarhjálpar hjá Sameinuðu þjóðunum, segir að ástandið í Jemen sé skelfilegt, en þar ríkir neyðarástand og óttast hann hungursneyð í landinu á þessu ári.
Stríð hefur geisað í landinu frá því hernaðaraðgerðir, sem Sádi-Arabar leiða, hófust með loftárásum í mars 2015 í þeim tilgangi að hrekja Huthi-fylkingu sjíamúslíma, sem nýtur stuðnings Írana, sem höfðu náð höfuðborginniSanaa og fleiri borgir á sitt vald.
O'Brian greindi öryggisráði SÞ frá því í gær, að stríðsátökin í Jemen ógnuðu mataröryggi í landinu, og raunar væri þetta versta neyðarástand af þeim toga í heiminum í dag.
„Verði ekki gripið til aðgerða þegar í stað þá er útlit fyrir hungursneyð árið 2017.“
Um það bil 14 milljónir íbúa, sem er tæplega 80% þjóðarinnar, þurfa á mataraðstoð að halda. Helmingur af þeim búa við alvarlegan skort að sögn O'Brien.
Þá segir hann að a.m.k. tvær milljónir þurfi á neyðarmatvælaaðstoð að halda til að lifa af.
Ástandið er sérstaklega slæmt fyrir börn, en um 2,2 milljónir ungbarna glíma við alvarlega bráðavannæringu. Það er 53% aukning samanborið við seinni hluta árs 2015.
O'Brien segir að á 10 mínútna fresti láti eitt barn undir 10 ára aldri lífið í Jemen af völdum sjúkdóma eða vannæringar sem hægt er að koma í veg fyrir.
Aðgerðir Sádi-Araba hafa leitt til þess að flugvöllurinn í Sanaa er lokaður. Það hefur mikil áhrif á íbúa landsins því ekki er hægt að fljúga með lyf til landsins og Jemenar geta ekki leitað sér læknisaðstoðar í öðrum löndum.
O'Brien segir að allt hveiti í landinu geti klárast innan fárra mánaða því erlendir bankar séu hættir að samþykkja millifærslur frá jemenskum viðskiptabönkum.