Vill ekki rannsókn á ásökunum um ofsóknir
Setja bókamerki
Aung San Suu Kyi, friðarverðlaunahafi Nóbels og leiðtogi ríkisstjórnar Búrma, hafnar ákvörðun mannréttindaráðs Sameinuðu þjóðanna um að gerð verði rannsókn á ásökunum um að her landsins hafi brotið gegn fólki af Rohingja-þjóðinni sem er minnihlutahópur múslima í landinu.
Sameinuðu þjóðirnar samþykktu í mars að gera út sendinefnt il landsins vegna ásakana um að fólk af Rohingja-þjóðinni sætti ofsóknum, væri myrt, því nauðgað og það pyntað í Rakhine-ríki.
„Við erum ekki samþykk þessu,“ sagði Suu Kyi á blaðamannafundi í Brussel í dag en hún er þangað komin til að ræða við forystumenn Evrópusambandsins. Hún segir stjórnvöld ekki taka undir samþykkt Sameinuðu þjóðanna því hún sé ekki í takti við það sem raunverulega sé að gerast.
Hún segir að stjórnvöld taki hins vegar fagnandi tillögum sem séu í samræmi við „raunverulegar þarfir svæðisins.“
En hún segir að tillögur, sem muni enn frekar kljúfa samfélagið í Rakhine, verði ekki samþykktar, „því þær munu ekki hjálpa við að leysa þau vandamál sem eru sífellt að koma upp.“
Minnkandi vinsældir
Vinsældir Suu Kyi, sem er friðarverðlaunahafi Nóbels, hafa minnkað í kjölfar ásakana um ofbeldi gegn Rohingjunum. Hún hefur lítið tjáð sig um málefni þessara íbúa landsins.
Rohingjar eru í raun ríkisfangslausir. Þeir hafa í tugþúsundavís flúið til nágrannlandsins Bangladess síðustu mánuði en þar bíður þeirra ekki góð vist. Til stendur að flytja þá á eyju sem flæðir yfir reglulega.
Suu Kyi hefur hafnað ásökunum um að hún og ríkisstjórn landsins séu að láta þjóðarmorð viðgangast. „Ég átta mig ekki á hvað þú meinar þegar þú segir að við höfum ekki haft neinar áhyggjur af ásökunum um að þjóðarmorð væri að eiga sér stað í Rakhine,“ segir hún. „Við höfum verið að rannsaka þessar ásakanir og höfum brugðist við.“
Segja þjóðernishreinsanir í gangi
Federica Mogherini, erindreki Evrópusambandsins, hefur hvatt stjórnvöld í Búrma til að styðja rannsókn Sameinuðu þjóðanna.
„Stofnun rannsóknarhópsins er eitt af mjög fáum ágreiningsmálum okkar á milli,“ sagði Mogherini á blaðamannafundinum. Hún sagði nauðsynlegt að vinna sameiginlega að því að finna lausn á málinu.
Sameinuðu þjóðirnar telja að herferð stjórnarhersins í Búrma gegn Rohingjum jafnist á við glæpi gegn mannkyni og að um þjóðernishreinsanir sé að ræða.
En Suu Kyi sagði við BBC fyrr í þessum mánuði: „Ég tel að þjóðernishreinsanir séu ekki að eiga sér stað.“
Breytingar á skipulagi fréttadeildar RÚV
Kaldasti veturinn kom að óvörum
Gígbarmurinn hækkað frá því í gær
Sex hafa greinst með listeríu
Strand skemmtiferðaskips kallar á erlenda aðstoð
Mál hjúkrunarfræðingsins fer aftur fyrir héraðsdóm