Alls fórst 141 manneskja í árás á flugstöð í suðurhluta Líbýu í gærkvöldi. Flestir þeirra sem létust voru hermenn sem eru hliðhollir Khalifa Haftar, fyrrverandi hershöfðingja.
Liðsmenn hersveitar sem er á bandi með ríkisstjórn Líbýu, sem Sameinuðu þjóðirnar styðja, réðust á flugstöð sem Haftar hefur notað undir Þjóðarher Líbýu, eins og hann kallar hann.
Á meðal fórnarlamba í árásinni voru óbreyttir borgarar sem störfuðu á flugstöðinni eða skammt frá henni.
Ríkisstjórn Líbýu segir að rannsókn muni fara fram á árásinni, því ekki hafi verið veitt leyfi fyrir henni.
Varnarmálaráðherra landsins, al-Mahdi al-Barghati, og yfirmaður hersveitarinnar sem gerði árásinna hafa verið leystir frá störfum meðan á rannsókninni stendur.