Franska lögreglan hefur ákært 23 ára gamlan mann fyrir brot á hryðjuverkalögum. DNA-sýni mannsins fannst á byssu Karim Cheurfi, sem skaut einn lögreglumann í höfuðið og særði tvo til viðbótar auk þýsks ferðamanns áður en lögreglan felldi hann. Árásin átti sér stað í lok apríl á breiðgötunni Champs Elysees í París viku fyrir forsetakosningar í Frakklandi. BBC greinir frá.
Maðurinn hefur ekki verið nafngreindur í fjölmiðlum og er ekki á skrá lögreglu yfir þekkta brotamenn. Hann var handtekinn í París. Hann hefur neitað að hafa þekkt til Cheurfi.
Talið er að Cheurfi hafi verið fylgismaður Ríkis íslams því í fórum hans fannst bréf þar sem hann lýsir yfir stuðningi við hryðjuverkasamtökin. Ríki íslams lýstu árásinni á hendur sér og segja einn af „baráttumönnum“ sínum hafa gert hana.
Hins vegar fullyrða þau að „Abu Yousif al-Belgik“ hafi gert hana en Belgik þýðir Belginn. Cheurfi var sjálfur úr austurhluta Parísar og hafði áður gefið til kynna að hann vildi myrða lögregluþjón.