Bangsímon ritskoðaður á samfélagsmiðlum

Getur verið að Bangsímon hafi tekist að vekja reiði kínverskra ráðamanna? Svo virðist vera því á kínverskum samfélagsmiðlum er búið er að loka á nokkrar vísanir í þennan ljúfa bangsa.

Kínversk yfirvöld hafa ekki greint frá því hvað veldur, en Bangsímon sem sjálfur lýsti sér sem „birni með mjög lítinn heila“ hefur áður verið notaður í svonefndum internet „meme“myndum  sem staðgengill Xi Jinping, forseta Kína.

Færslur með mynd af Bangsímon og kínverskum táknum hans eru þó enn leyfilegar á Weibo, sem er kínverska útgáfan af Twitter.

Allar færslur sem vísa í „Litla bangsann Winnie“ sem er kínverska nafnið á Bangsímon leiða nú til villuskilaboða, sem segja að notandinn geti ekki haldið áfram af því að „efnið sé ólöglegt“.

Þá er búið að fjarlægja allar Bangsímonmyndir úr WeChat myndasafninu, en enn er þó hægt að nálgast myndir af bangsa í einkaskilaboða appinu.

Fyrst var farið að líkja Xi við Bangsímon árið 2013 þegar notendur kínverskra samfélagsmiðla tóku að dreifa mynd þar sem búið var að skipta út þeim Xi og Barack Obama, þáverandi Bandaríkjaforseta, fyrir þá Bangsímon og Tuma tígur.

2014 var þeim Bangsímon og asnanum Eyrnaslapa síðan líkt við ljósmynd af þeim Xi og Shinzo Abe, forsætisráðherra Japans, að takast í hendur.

Óháði fjölmiðlafræðingurinn Qiao Mu, sem áður var prófessor við Peking háskóla, segir ekki koma á óvart að Bangsímon hafi orðið fyrir barðinu á ritskoðurum, þegar haft sé í huga hve kommúnistaflokkurinn sé viðkvæmur fyrir þeirri ímynd sem dregin sé upp leiðtoga landsins.

Xi og Shinzo Abe, forsætisráðherra Japans, heilsast og sama gera þeir Eyrnaslapi og Bangsímon. Skjáskot

• Blogga um frétt