Mánudaginn 12. júní var Mohammed Altai, 16 ára gamall nemandi við Holmlia-skólann í austurhluta Óslóar, fluttur með hraði á Ríkissjúkrahúsið í borginni eftir að hafa farið í hjartastopp skammt frá skólanum. Þetta gerðist eftir að hann lenti í átökum við 18 ára gamlan mann sem sló hann niður, en aðrir nemendur við skólann sáu atvikið að mestu leyti frá skólalóðinni og gátu borið vitni.
Fyrir liggur í málinu að Altai og árásarmaðurinn þekktust og hefur sá síðarnefndi gefið þá skýringu að hann hafi heimsótt fórnarlambið í skólann með það fyrir augum að ræða við það. Altai komst aldrei til meðvitundar eftir árásina og fékk lögregla því aldrei að heyra hans hlið á málinu, að sögn Andreas Strand, lögfræðings lögreglunnar í Ósló, í samtali við norska dagblaðið VG.
Øyvind Bratlien er verjandi mannsins sem í fyrstu var úrskurðaður í gæsluvarðhald fyrir stórfellda líkamsárás en á nú yfir höfði sér eina af þremur mögulegum manndrápsákærum í norskum rétti þar sem ásetningsstigin eru þrjú.
„Skjólstæðingi mínum féllu fréttirnar [af andlátinu] þungt, hann segist ekki hafa slegið þolandann með öðru en flötum lófa og telur ekki samhengi milli gjörða sinna og þess hvernig fór,“ segir Bratlien í samtali við VG og kveður skjólstæðing sinn ekki játa refsiábyrgð í málinu.
Rannsókn lögreglu beinist nú fyrst og fremst að því að draga upp heildarmynd af atburðinum og ekki síst forsögu málsins. Krufning á líki Altai fór fram í gær en að sögn Andreas Strand kýs lögregla að gefa ekki upp dánarorsökina fyrr en rætt hefur verið við aðstandendur hins látna og niðurstaðan kynnt hinum grunaða.