Aung San Suu Kyi, leiðtogi Búrma, mun ekki vera viðstödd allsherjarþing Sameinuðu þjóðanna í næstu viku að því er BBC greinir frá. Suu Kyi sætir nú vaxandi gagnrýni hjá alþjóðasamfélaginu fyrir að gera ekkert til að stöðva ofsóknir í garð Rohingja-fólks, sem er minnihlutahópur múslima í landinu.
Talið er að um 370.000 Rohingjar hafa nú flúið hernaðaraðgerðir stjórnarhersins í Rakhine fylki eftir að til átaka kom þar í síðasta mánuði. Zeid Raad al-Hussein, mannréttindastjóri Sameinuðu þjóðanna, sagði í gær aðgerðir stjórnarhersins vera skólabókadæmi um þjóðernishreinsanir.
Margir helstu stuðningsmanna Suu Kyi á Vesturlöndum til þessa hafa nú gagnrýnt hana fyrir aðgerðarleysi gegn þeirri grimmd sem herinn sýnir Rohingjum, sem flýja nú landið í ofboði.
Herinn í Búrma segist hins vegar vera að berjast við uppreisnarmenn Rohingja og neitar með öllu að aðgerðunum sé beint gegn almennum borgurum.
Zaw Htay, talsmaður búrmísku stjórnarinnar, segir Suu Kyi ekki verða meðal þátttakenda á allsherjarþinginu. Hún flutti ræðu þar á síðasta ári og varði þá aðgerðir búrmískra ráðamanna í garð Rohingja. Htay tjáði sig ekki frekar um það hvers vegna Suu Kyi verði fjarverandi.
Annar talsmaður stjórnarinnar, Aung Shin, sagði Reuters fréttastofunni að „mögulega“ þurfi Suu Kyi að taka á „meira aðkallandi málum,“ og bætti við „hún er aldrei hrædd við gagnrýni eða að taka á vandamálum“.
Sendifulltrúi Búrma hjá Sameinuðu þjóðunum segir Rohingja bera ábyrgð á átökunum í Rakhine fylki. Búrmísk stjórnvöld muni aldrei líða slík grimmdarverk. Margir þeirra sem flúið hafa til Bangladess segja hins vegar búrmíska herinn hafa brugðist við árásum uppreisnarmanna Rohingja 25. Ágúst með hrottalegum árásum þar sem þorp hafi verið brennd með það að markmiði að hrekja íbúa á brott.