Lögreglustjóri svæðislögreglunnar í Katalóníu, Josep Lluis Trapero, verður leiddur fyrir dómara í Madrid í dag. Trapero er grunaður um að dreifa uppreisnaráróðri gegn spænska ríkinu.
Lögreglusveitir Katalóníu, „Mossos d'Esquadra“, undir hans stjórn, eru sakaðar um að hafa brugðist því að vernda lögreglumenn úr röðum spænsku lögreglunnar fyrir mótmælendum sem fjölmenntu á götur Katalóníu 1. október, daginn sem héraðið kaus um sjálfstæði frá Spáni.
Annar yfirmaður úr röðum katalónsku lögreglunnar og tveir forystumenn sjálfstæðissinna verða einnig leiddir fyrir dómara, grunaðir um sams konar brot og Trapero. Þá eru fjórmenningarnir einnig sakaðir um að hafa brugðist því að hjálpa borgararlögreglunni í Barcelona við að ná tökum á þúsundum mótmælenda sem komu saman við efnahagsskrifstofu Katalóníu í Barcelona 20. september.
Mikil óvissa ríkir um framtíð Katalóníu. Hæstiréttur Spánar dæmdi kosninguna um sjálfstæði Katalóníu frá Spáni ólöglega. Kosningaþátttaka var um 42% og kusu 90% með aðskilnaði frá Spáni. Lokatölur hafa þó enn ekki verið birtar.
Stjórnlagadómstóll Spánar frestaði í gær fyrirhuguðum þingfundi katalónska þingsins sem halda átti á mánudag til að reyna að hindra að héraðið geti lýst yfir sjálfstæði.
BBC greinir frá því að forsætisráðherra Spánar, Mariano Rajoy, muni funda með ríkisstjórn sinni í dag þar sem næstu skref verða rædd.