Búið er að fyrirskipa lokun allra skóla í Delhi, höfuðborg Indlands, eftir að loftmengun í borginni mældist 70 sinnum yfir mörkum Alþjóðaheilbrigðisstofnunarinnar (WHO). Hafa læknar í borginni varað við því að neyðarástand sé hér á ferðinni.
Mikil skelfing greip um sig í Delhi í gær er borgarbúar vöknuðu í þykku mengunarskýi.
AFP segir þykka mengunarþoku liggja yfir öllu, og hylja nú margir vit sín með vasaklútum eða hálsklútum á ferð sinni um borgina.
Á vef bandaríska sendiráðsins í Delhi kom fram að um 700 sótagnir, svonefndar PM 2,5, mældust nú á hvern rúmmetra sem er 70 sinnum yfir mörkum WHO.
„Þegar ég kom til Delhi árið 1984 var loftið í borginni hreint. En í morgun klukkan fjögur þegar ég lagði af stað í vinnu sá ég varla handa minna skil,“ sagði tesalinn Jeevanand Joshi.
„Þetta er ekki þoka, þetta er reykur og hann er alveg örugglega að gera okkur veik.“
Indversku læknasamtökin (IMA) hafa lýst yfir heilsufarslegu neyðarástandi og hvetja stjórnvöld til að gera allt sem á þeirra valdi er til að „vinna bug á ógninni“. Þá hefur indverska veður- og loftslagsstofnunin varað við því að ástandið eigi eftir að versna enn frekar á næstu dögum.
Auk þess að loka öllum skólum í borginni hefur einnig verið lagt bann við öllum leik og frístundastarfi utandyra á meðan mengunin er í þessu magni.
Um 20 milljónir manna búa í Delhi, sem telst mengaðasta borg í heimi og slær þar jafnvel Peking við. Frá því að WHO sýndi fram á umfang vandans árið 2014 hafa yfirvöld gripið til aðgerða eins og að loka orkuverum tímabundið og gert tilraun með að draga úr umferð á götum borgarinnar, en þessar tímabundnu aðgerðir hafa haft lítil áhrif til þessa.