Öryggisráð Sameinuðu þjóðanna fundaði á heldur óvenjulegum stað þegar fulltrúar ráðsins komu saman á afskekktu sveitasetri á Skáni í Svíþjóð. Vanalega fara fundir öryggisráðsins fram í New York í Bandaríkjunum.
Um er að ræða árlegan óformlegan fund þar sem búist er við að ástandið í Sýrlandi verði í forgrunni. Vonir standa til að hægt verði að miðla málum og ná sáttum á milli fulltrúanna í tengslum við stríðið í Sýrlandi.
Svíar vonast til að þess að fundurinn muni leiða til þess að aukinn skriður komist á viðræðurnar. að því er segir á vef BBC.
Tilgangurinn fundarins er að fá menn til að leggjast í hugmyndavinnu. Viðstaddir eru 15 sendifulltrúar öryggisráðs SÞ ásamt framkvæmdastjóranum Antonio Guterres.
Fundurinn fer nú fram í Backåkra í Svíþjóð. Svíar eiga ekki fast sæti í öryggisráðinu.
Dag Hammerskjöld, fyrrverandi framkvæmdastjóri SÞ, bjó í húsinu þar sem fundurinn fer fram. Hammerskjöld lést í flugslysi í Afríku árið 1961.
Carl Skau, varafulltrúi Svía hjá SÞ, segir að hugmyndin með fundarstaðnum hafi verið að koma á samtali og koma skriði á viðræður þar sem auðmýkt og þolinmæði verða í forgrunni. Fundurinn á sér stað viku eftir að Bandaríkin, Bretar og Frakkar gerðu loftárásir á skotmörk í Sýrlandi til að refsa þarlendum stjórnvöldum fyrir eiturvopnaárás sem var gerð í Douma þar sem saklausir borgarar létust.
Skau segir að þetta sé mikilvægur fundur fyrir trúverðugleika öryggisráðsins.