Ekki sjálfsagt að sæðið standi sig

Borgaryfirvöld í Kaupmannahöfn hafa sett af stað nýja herferð til þess að hvetja karlmenn til þess að eignast börn áður en það verði of seint. Karlar eru varaðir við því að taka því sem gefnu að sæðisfrumur þeirra séu vel syndar og frjósamar, auk þess sem gæði sæðisins minnki með aldrinum.

Myndband, sem birtist á Facebook-síðu borgarinnar í vikunni, hefst á myndbroti af teiknuðu ungu pari, þar sem karlinn segir: „Ég vil gjarnan eignast börn, bara eftir nokkur ár“ og á væntanlega að varpa ljósi á dæmigerðar samræður nútímapars í Kaupmannahöfn um barneignir.

Í borginni eignast karlar sín fyrstu börn þegar þeir eru 33 ára gamlir og konur verða ekki mæður fyrr en 31 árs gamlar, að meðaltali. Kaupmannahafnarbúar eru þannig um tveimur árum yfir danska landsmeðaltalinu, hvað barneignir varðar.

Ekki taka því sem gefnu að sæðið þitt virki, segja borgaryfirvöld í Kaupmannahöfn. Mynd/Kaupmannahöfn

Í myndbandinu situr parið áhyggjulaust með vínglas við hönd, en þá grípur þulurinn inn í og bendir þeim á að kannski væri ekki óvitlaust að fara að huga að barneignum, þar sem þær geti tekið tíma. Bent er á að orsakir ófrjósemi hjá pörum megi til jafns finna hjá konum og körlum.

„Þú getur ekki reiknað með að sæðið þitt virki,“ segir þulurinn og bendir á að fjórði hver karlmaður sé með lakari frjósemi en ákjósanlegt væri. Þá verði fimmti hver karlmaður í Danmörku aldrei faðir.

„En það þarf ekki að verða þú. Byrjaðu tímanlega, ef þú vilt eignast börn,“ segir þulurinn og beinir áhorfandanum svo inn á vefsíðuna spillerdinsæd.dk, þar sem frekari upplýsingar um frjósemi má finna.

Sæðisgæðin minnka með aldrinum

Á vefsíðunni er að finna frekari leiðbeiningar um frjósemi og einnig leiðbeiningar um það hvað skuli hafa í huga þegar bryddað er upp á samræðum um barneignir við makann.

Á síðunni er bent er á að aldur karla og kvenna hafi þýðingu fyrir það hversu líklegt er að getnaður verði og að með hækkandi aldri konunnar minnki líkur á getnaði. Hækkandi aldur karlsins hafi líka í för með sér aukna áhættu á því að sæðisgæðin minnki og því eldri sem karlmenn séu, því erfiðara verði það fyrir þá að gera konu ólétta og að áhættan á bæði fósturláti og alvarlegum sjúkdómum aukist.

Þessum tveimur er lýst sem fullum af eftirsjá, þar sem þau huguðu ekki nógu snemma að barneignum. Mynd/Kaupmannahöfn

„Ef þið eruð sammála um að það sé kominn tími á barn, eru nokkur tæknileg atriði sem er gott að þekkja. Til dæmis er gott að vita að egg konunnar er einungis móttækilegt fyrir sæðisfrumum 12-24 tíma eftir að egglos hefur átt sér stað. Það er því góð hugmynd að stunda kynlíf daginn fyrir eða á þeim degi sem konan er með egglos,“ segir á síðunni.

„Hvað kostar þetta?“

Herferðin var sett í loftið á Facebook-síðu Kaupmannahafnarborgar á þriðjudag og strax varð ljóst í kommentakerfinu að einhverjir voru ósáttir við þessa upplýsingagjöf og hvatningu borgarinnar til íbúa.

Maður að nafni Claus Flyger spurði að því á þræðinum hvort skattfé hefði verið notað við gerð herferðarinnar „og ef svo væri; AF HVERJU?“.

Claus fékk svar um hæl frá starfsmanni borgarinnar, sem upplýsti hann um að herferðin hefði kostað borgina um 250.000 danskar krónur eða rúmar 4,5 milljónir íslenskra króna og væri liður í upplýsingagjöf til íbúa borgarinnar, sem margir glímdu við ófrjósemisvanda, rétt eins og önnur heilbrigðisvandamál.

Svipuð herferð árið 2015

Þetta er ekki í fyrsta sinn sem herferð á borð við þessa er beint að Kaupmannahafnarbúum, en árið 2015 stóð borgin fyrir svipaðri herferð í samstarfi við danska umhverfisráðuneytið.

Sem áður segir eru borgarbúar nú jafnan komnir yfir þrítugt þegar þeir eignast sín fyrstu börn, en að auki er tólfta hvert barn í Danmörku almennt getið með tæknifrjóvgun.

Ljóst er að yfirvöld vilja gjarnan að spýtt sé í, enda aldrei nóg af nýjum skattgreiðendum á leiðinni.

• Blogga um frétt