Blaðamaður á vegum bandaríska fréttatímaritsins Newsweek hefur verið dæmdur í 13,5 árs fangelsi í Íran auk þess sem hann skal þola 50 svipuhögg.
Maziar Bahari er bæði með íranskan og kanadískan ríkisborgararétt. Hann var fangelsaður í tengslum við óeirðirnar í Íran í framhaldi af forsetakosningunum þar í landi í júní á síðasta ári.
Eftir fjögurra mánaða vist í írönsku fangelsi var Bahari látinn laus gegn 300 þúsund bandaríkjadala tryggingu og fékk leyfi til þess að ferðast til London í október sl. til þess að verja tíma með maka sínum sem þar býr og starfar.
Sökum þessa var dómurinn kveðinn upp að Bahari fjarstöddum fyrr í þessum mánuði. Lögmaður Bahari hefur enn ekki fengið neinar formlegar upplýsingar frá dómstólnum um niðurstöðu hans.
Fréttaskýrendur telja að a.m.k. 50 íranskir fréttamenn dvelji nú um stundir í fangelsi í Íran. Sökum þessa ákvað heimssamband fréttamanna (IFJ) að helga dag frjálsrar fjölmiðlunar, sem haldinn var 3. maí sl., sérstaklega aðstæðum þessara fréttamanna í Íran.