Óskar biður um að samningi hans við Faxaflóahafnir verði rift

Óskar Bergsson, varaborgarfulltrúi Framsóknarflokksins, hefur óskað eftir því að verktakasamningi hans við Faxaflóahafnir verði rift. Óskar segist í yfirlýsingu gera þetta til þess að friður og sátt ríki um það verkefni, sem hann réði sig til að vinna fyrir fyrirtækið, sem var að stuðla að þróun og uppbyggingu Mýrargötusvæðisins.

Yfirlýsing Óskars er eftirfarandi:

Verktakasamningur minn við Faxaflóahafnir hefur undanfarna daga verið harðlega gagnrýndur af fulltrúum í minnihluta borgarstjórnar Reykjavíkur og fjölmiðlum. Ég gegni stöðu varaborgarfulltrúa fyrir Framsóknarflokkinn, formanns Framkvæmdaráðs og varaformanns Skipulagsráðs. Í umræðunni hefur því verið haldið fram að ég sé beggja vegna borðs og þar með ófær um að gera greinarmun á hagsmunum Reykjavíkurborgar og Faxaflóahafna. Svo vill til að hagmsunir beggja fara saman í því verkefni sem ég tók að mér.

Fyrir liggur lögfræðilegt álit um hæfi mitt. Sem iðnrekstrarfræðingur réði ég mig til verksins í þeirri trú að ég gæti sinnt því af eindrægni án þess að það bitnaði á öðrum störfum mínum fyrir Reykjavíkurborg. Almenna reglan er sú að störf í sveitarstjórnum eru álitin aukastörf, ekki síst þegar um er að ræða varamann eins og í mínu tilviki.

Sú gagnrýni sem beinst hefur að mér að undanförnu er ómakleg og af pólitískum rótum sprottin. Hún hefur ekki aðeins skaðað verkefnið heldur fjölskyldu mína. Hún hefur ennfremur varpað skugga tortryggni á starfshætti meirihluta borgarstjórnar.

Það er sannfæring mín að í umræddu verkefni sé ekki um neina hagsmunaárekstra að ræða. Til þess að friður og sátt ríki um verkefnið hef ég ákveðið að óska eftir því að samningi mínum við Faxaflóahafnir verði rift. Ég vænti þess að almenningur í borginni skilji þá ákvörðun mína og virði.

• 7 blogg um fréttina

Bloggað um fréttina

• Heiðar Birnir: Göfugur maður
• Stefán Friðrik Stefánsson: Óskar biður um að samningi verði rift
• G. Tómas Gunnarsson: Góð ákvörðun
• Salvör Kristjana Gissurardóttir: Óskar og ofsóttir Framsóknarmenn
• Snorri Bergz: Leiðinlegt mál
• TómasHa: Skynsamleg ákvörðun
• Páll Vilhjálmsson: Pólitískar rætur gagnrýni á Óskar