3.500 olíubílar af brautinni

eftir Helga Bjarnason

helgi@mbl.is

Olíuflutningar um Reykjanesbrautina minnka verulega vegna þess að farið er að landa meginhluta af flugvélaeldsneytinu sem notað er á Keflavíkurflugvelli í Helguvíkurhöfn. Olíufélögin hafa fengið afnot af þremur tönkum Atlantshafsbandalagsins við Helguvík og Reykjaneshöfn hefur tekið að sér rekstur allrar hafnarinnar.

Eftir að varnarliðið fór tók ríkið við rekstri olíutanka og tilheyrandi hafnarmannvirkja NATO í Helguvík. Pétur Jóhannsson hafnarstjóri segir að Reykjaneshöfn muni sjá um rekstur hafnarmannvirkja, mengunarvarnir og öryggisgæslu á meðan skip eru í höfn. Allt hafnarsvæðið er nú innan hafnarsvæðis Reykjaneshafnar.

Fyrsti farmurinn kominn

Jafnframt tók félag í eigu þriggja stærstu olíufélaganna og Flugleiða, EBK hf., við rekstri þriggja olíutanka við Helguvík. Olíufélagið sem er að taka við sölu eldsneytis til Flugleiða þessa dagana hefur þegar flutt inn fyrsta farminn og látið skipa honum upp í Helguvík. Olís notar tankana einnig. Hingað til hefur öllu flugvélaeldsneyti fyrir borgaralegt flug um Keflavíkurflugvöll verið landað í Reykjavík eða Hafnarfirði og ekið með tankbílum til Keflavíkurflugvallar. Guðjón Auðunsson, framkvæmdastjóri hjá Olíufélaginu, segir að þær aðstæður hafi skapast nú, vegna þess að ríkið hafi tekið að sér umsjón tankanna í Helguvík og Olíufélagið að taka við Flugleiðaviðskiptunum, að hægt hafi verið að semja um notkun tankanna. Olíufélagið mun flytja þarna inn um 130 til 140 þúsund tonn af flugvélaeldsneyti, að sögn Magnúsar Ásgeirssonar í innkaupadeild Olíufélagsins. Ef eldsneytið hefði verið flutt með bílum úr Örfirisey hefðu þeir þurft að fara um 3.500 ferðir til Keflavíkur.

Leiðslur liggja úr olíutönkunum í Helguvík og upp á Keflavíkurflugvöll en þær eru ekki tengdar tönkum EBK á flugþjónustusvæðinu. Á vegum flugvallaryfirvalda er unnið að undirbúningi tengingar þar á milli en eldsneytið verður flutt á bílum milli tankanna fyrst um sinn.

Pétur bindur vonir við að hinir fjórir olíutankarnir verði einnig teknir í notkun, fyrir aðrar tegundir eldsneytis, jafnvel á alþjóðavísu. "Það er mikilvægt að koma þeim öllum í gagnið því annars fer þetta að grotna niður og skemmast," segir hann.

Olíuinnflutningurinn um Helguvík skapar Reykjaneshöfn umtalsverðar tekjur. "Við vonum að þessi nýju umsvif muni bæta okkur upp það tekjutap sem við urðum fyrir við brottför varnarliðsins," segir Pétur en miklum hluta af innflutningi til varnarliðsins var skipað upp í höfnum Reykjanesbæjar.

Sjá nánar í Morgunblaðinu í dag.