Stjórn Spalar hefur samþykkt að lækka veggjald í Hvalfjarðargöngum 1. mars 2007. Stök ferð í flokki heimilisbíla lækkar úr 1000 krónum í 900 krónur. Á vef Spalar kemur fram innheimtur hafi verið þúsundkall fyrir staka ferð allt frá því göngin voru opnuð í júlí 1998 en hann heyri brátt sögunni til í þessum skilningi.

Er þetta samkvæmt vef Spalar meiri lækkun heldur en virðisaukaskattslækkun sem tekur gildi þann 1. mars. Afsláttar- og áskriftargjöld lækka líka umfram virðisaukaskattslækkun sem tekur gildi þann 1. mars. Lægsta veggjald í göngunum er nú 270 krónur en verður 253 krónur frá og með 1. mars. Þá upphæð greiða áskrifendur sem kaupa 100 ferðir heimilisbíls í 1. gjaldflokki og borga þær fyrirfram.

Viðskiptavinir Spalar greiddu ríkissjóði alls um 140 milljónir króna í virðisaukaskatt af veggjaldi á síðasta rekstrarári ganganna. Ríkið skerðir því þessar tekjur sínar um 70 milljónir króna á ári með því að lækka virðisaukaskatt á gjaldinu um helming.

„Spölur skerðir svo eigin tekjur um 13-14 milljónir króna ári með því að lækka veggjaldið meira en svarar til skattabreytingarinnar. Þar munar langmest um þá ákvörðun að fara með gjald fyrir staka ferð heimilisbíls í 1. gjaldflokki niður í 900 krónur. Það er nefnilega svo að þúsundkallinn stóð undir 31% af tekjum Spalar á síðasta rekstrarári," að því er segir á vef Spalar.

„Fleiri tíðinda má vænta af gjaldskrármálum Spalar með vorinu. Í maí er ætlunin að taka í notkun fullkominn búnað til að mæla lengd bíla í gjaldhliðum ganganna og um leið tekur gildi gjaldskrá með nýjum flokki fyrir 6-8 metra bíla. Veggjald lækkar þá verulega hjá þeim sem færast niður um gjaldflokk. Nánar verður upplýst um nýju gjaldskrána þegar nær dregur og fyrir liggur hvenær unnt verður að hrinda breytingunni í framkvæmd. Sú tímasetning ræðst nefnilega af því hvenær mælingabúnaðurinn kemst í gagnið."