Stela íslenskum myndum
Mynd eftir Rebekku Guðleifsdóttur. mbl.is
Rebekka Guðleifsdóttir hefur sett netheima á annan endann með því að ljóstra upp um þjófnað á ljósmyndum sínum af íslenskri náttúrufegurð. Rebekka hafði sett myndirnar inn á hina vinsælu ljósmyndasíðu flickr.com en einhver óprúttinn aðili á Bretlandseyjum virðist hafa grætt hundruð þúsunda á því að selja eftirprentanir af þeim sem plaköt.
Rebekka segist fyrst hafa orðið vör við stuldinn stuttu fyrir síðustu áramót. „Það var tilviljun sem réð því að maður sem ég þekki í Bretlandi rakst á þessar myndir til sölu," segir Rebekka.
Kvartaði til e-bay
„Það kom í ljós að töluverður fjöldi mynda eftir mig var til sölu hjá þessu fyrirtæki. Ég kvartaði til e-bay, sem var milligönguaðili um að selja myndirnar, og einnig til fyrirtækisins sjálfs sem heitir only-dreemin.com. E-bay vildi ekkert fyrir mig gera og only-dreemin baðst bara afsökunar, tók myndirnar af e-bay og hætti svo að svara tölvubréfum frá mér í mars síðastliðnum. Á e-bay er aðeins hægt að sjá viðskipti sex mánuði aftur í tímann en samkvæmt þeim gögnum sem ég hef safnað seldust myndirnar fyrir meira en 2.500 pund á þessum tíma. Ég hef engan aðgang að eldri gögnum en verslunin hefur verið starfrækt í meira en fjögur ár. Þar fyrir utan selur fyrirtækið einnig myndir í gegnum sína eigin heimasíðu og ég get ekki áætlað hvað þeir hafa selt mikið með þeim hætti."Rebekka, sem er námsmaður og einstæð móðir, leitaði til íslensks lögmanns en hann taldi sig ekki geta aðstoðað hana við að sækja skaðabætur í Bretlandi. Fyrir sitt leyti sagðist talsmaður, stjórnarformaður, ritari og hugsanlegur eigandi only-dreemin ekki vilja láta hafa neitt eftir sér í Morgunblaðinu (þrátt fyrir langt samtal við blaðamann) án þess að fá að ritskoða textann. Talsmaður fyrirtækisins lét þó sömu orð falla í tölvubréfi til almenns viðskiptavinar sem birtur hefur verið opinberlega á Netinu.
„Takk fyrir að hóta okkur ekki dauða, eins og aðrir hafa gert," segir forsvarsmaðurinn í upphafsorðum tölvubréfsins. Hann segist síðan hafa keypt myndirnar löglega, á þrjú þúsund pund, af fyrirtæki sem nefnist „Wild Aspects and Panoramics LTD". Talsmaður only-dreemin.com heldur því ennfremur fram að lögfræðingar hafi ráðlagt honum að hætta öllum samskiptum við Rebekku og lögfræðing hennar. Að lokum segir í tölvubréfinu: „Þar sem Rebekka hefur opinberað þetta mál getum við núna útskýrt málavexti og að sjálfsögðu beðist afsökunar."
Að sögn Rebekku eru þessar útskýringar ófullnægjandi. „Þeir hafa frá upphafi hamrað á þessari tölu, þrjú þúsund pundum. Samt var ekki hægt að fá nein nöfn upp úr þeim til að byrja með. Eftir að fólk fór að taka eftir þessu á Netinu hef ég hins vegar loks fengið uppgefið heiti á fyrirtæki sem virðist ekki vera til. Að minnsta kosti er ekki hægt að finna það á Google."
Rebekka sagðist ekki telja það vera í sínum verkahring að finna einhvern þriðja aðila sem seldi myndirnar. „Þessir menn vita að þeir seldu myndir ólöglega fyrir háar upphæðir og þeir eiga einfaldlega að bæta mér það. Þeir geta síðan lögsótt þennan þriðja aðila, ef hann er yfir höfuð til."
Rebekka segir að sá stuðningur sem hún hefur fengið á Netinu hafi komið sér á óvart en jafnframt verið ómetanlegur.
