Hvalveiðar hafa minni áhrif á ferðamannaiðnaðinn en talið var

Þriðjungur þeirra sem telja líklegt að þeir muni ferðast til Íslands næstu fimm árin segir að hvalveiðar muni minnka líkurnar á að þeir heimsæki landið. Þetta kemur fram í nýrri könnun sem Ferðamálastofa lét gera fyrir samgönguráðuneytið. Tæp 10% segja hins vegar að veiðar myndu auka líkur á Íslandsferð.

Markmið könnunarinnar var að rannsaka hvaða áhrif hvalveiða í atvinnuskyni hafa á ímynd Íslands og íslenska ferðaþjónustu. Könnunin fór fram í Svíþjóð, Frakklandi, Þýskalandi, Bretlandi og Bandaríkjunum og er byggð á rúmlega fimm þúsund svörum frá þessum löndum.

Samhliða þessu voru könnuð viðhorf söluaðila íslenskrar ferðaþjónustu á erlendum mörkuðum og telja um 60% þeirra að hvalveiðar Íslendinga minnki líkur á því að viðskiptavinir þeirra heimsæki Ísland.

Á vefsíðu samgönguráðuneytisins kemur fram a meðal annarra niðurstaðna könnunarinnar er að hvalveiðar í atvinnuskyni hafi á heildina litið einhver neikvæð áhrif á viðhorf almennings til Íslands.

Einnig minnki þær líkurnar á því að sá hluti svarenda sem telur mjög líklegt eða frekar líklegt að hann ferðist til Íslands á næstu fimm árum láti verða af því.

Í könnuninni mælist almenn ímynd Íslands jákvæð og þegar spurt er hvað komi helst upp í hugann þegar Ísland er nefnt nefna flestir hveri, hesta, Reykjavík og Björk.

Samgönguráðuneytið segir að draga megi þá ályktun af könnuninni að hvalveiðar Íslendinga í atvinnuskyni séu ólíklegar til að hafa mikil áhrif á íslenska ferðaþjónustu í bráð. Byggist hún meðal annars á því að markhópurinn er ekki vel upplýstur um þá staðreynd að Íslendingar stunda hvalveiðar í atvinnuskyni og hins vegar því að þótt viðhorf til hvalveiða séu almennt neikvæð virðast þau hafa lítil tengsl við ímynd Íslands sem áfangastaðar.

• 2 blogg um fréttina

Bloggað um fréttina

• Stefán Jónsson: Nákvæmlega það sem ég er búinn að vera að segja
• Sigurgeir Orri Sigurgeirsson: Heim og saman