„Þetta er kraftaverk"

Eftir Skapta Hallgrímsson

skapti@mbl.is

Magni Hjaltason, litli drengurinn sem naumlega var bjargað frá drukknun í Sundlaug Akureyrar í fyrradag, var við hestaheilsu og fékk að fara heim af Fjórðungssjúkrahúsinu í gær. Hann var dasaður en ótrúlega sprækur þegar Morgunblaðið heimsótti fjölskyldu hans.

"Magni var á vappi í kringum okkur en hvarf allt í einu," sagði Anita Júlíusdóttir, móðir Magna. Hún segir soninn jafnan leika sér í heitu pottunum og busllauginni, en aldrei hafa viljað fara ofan í sundlaugina sjálfa.

Virtist heil eilífð

Magni hefur einhverra hluta vegna tekið af sér armkútana, líklega tekið á sprett á bakkanum og runnið til. Hann lenti í lauginni og náði ekki til botns. Svo heppilega vildi til að fólk, þaulæft í björgunarstörfum, var nýkomið ofan í laugina, sá drenginn og blés í hann lífi.

„Þetta er algjört kraftaverk. Hann var alveg lífvana á bakkanum; það var hryllileg sjón og alveg stimpluð í mig," sagði Anita í gær. "Það var erfitt að horfa á fólkið hamast við að lífga barnið við; nokkrar sekúndur virtust sem eilífð," sagði hún.

Það fyrsta sem Magni bað mömmu sína um í gærmorgun þegar hann vaknaði, og sá að klukkan var orðin sjö, var að senda sms á leikskólann og tilkynna að hann kæmist ekki þangað!

Sjá nánar í Morgunblaðinu í dag.