Mikill fjöldi við kveðju- og minningarathöfn um Einar Odd Kristjánsson
mbl.is/Sverrir
Þeir Geir H. Haarde, forsætisráðherra, Davíð Oddsson, Seðlabankastjóri, Þorsteinn Pálsson, ritstjóri Fréttablaðsins, Vilhjálmur Egilsson, framkvæmdastjóri Samtaka atvinnulífsins, Víglundur Þorsteinsson, stjórnarformaður BM Vallár, Styrmir Gunnarsson, ritstjóri Morgunblaðsins, Gunnar J. Birgisson, bæjarstjóri í Kópavogi og Ásmundur Stefánsson, ríkissáttasemjari, báru kistuna út úr kirkjunni.
Einar Oddur var þingmaður Sjálfstæðisflokksins í Norðvesturkjördæmi. Einar Oddur var 64 ára að aldri og lætur eftir sig eiginkonu, Sigrúnu Gerðu Gísladóttur og þrjú uppkomin börn.
Einar Oddur fæddist á Flateyri 26. desember 1942, sonur hjónanna Kristjáns Ebenezersonar skipstjóra og Maríu Jóhannsdóttur símstöðvarstjóra.
Einar Oddur nam við Menntaskólann á Akureyri. Hann vann sem skrifstofumaður á árunum 1961-65 og sem póstafgreiðslumaður 1965-68. Hann var framkvæmdastjóri Fiskiðjunnar Hjálms hf. 1968-93 og framkvæmdastjóri Útgerðarfélags Flateyrar 1974-93. Síðar sat hann í stjórnum og var stjórnarformaður í Hjálmi hf., Vestfirskum skelfiski hf. og Kambi hf.
Einar Oddur var fyrst kjörinn á þing árið 1995 og var þingmaður Vestfjarða og síðar NV-kjördæmis allt til dauðadags. Hann hóf ungur afskipti af stjórnmálum og var formaður Sjálfstæðisfélags Önundarfjarðar 1968-79, sat í hreppsnefnd Flateyrarhrepps á árunum 1970-82, var formaður fulltrúaráðs Sjálfstæðisflokksins í Vestur-Ísafjarðarsýslu 1979-90, formaður kjördæmisráðs Sjálfstæðisflokksins á Vestfjörðum 1990-92. Hann var formaður efnahagsnefndar ríkisstjórnarinnar árið 1988.
Einar Oddur sat í fjölmörgum stjórnum um ævina. Hann var formaður Vinnuveitendasambands Íslands 1989-92, sat í stjórn Atvinnuleysistryggingasjóðs árið 1995 og í stjórn Grænlandssjóðs síðan 2001. Hann sat í stjórn Vinnuveitendafélags Vestfjarða frá 1974. Á árunum 1983-89 sat hann í varastjórn Sölumiðstöðvar hraðfrystihúsanna og í stjórn Icelandic Freezing Plant Ltd í Grimsby 1987-89. Hann var stjórnarformaður Vélbátaútgerðarfélags Ísfirðinga síðan 1984 og í stjórn Samtaka fiskvinnslustöðva 1981-96.
Einar Oddur var sæmdur heiðursmerki Fálkaorðunnar árið 1992 fyrir störf að félagsmálum, en Einar Oddur var einn aðalhöfundur hinnar svonefndu þjóðarsáttar.
