Þyrla Landhelgisgæslunnar TF Gná Af vef Landhelgisgæslunnar

Leit stendur yfir um 50 sjómílur vestur af Reykjanesi að tveggja hreyfla flugvél af gerðinni Cessna 310 sem fór þar í hafið um 50 sjómílur vestur af Keflavík eftir að hafa misst báða hreyflana um klukkan 16 í dag. Einn maður var um borð.  Landhelgisgæslan sendi þyrlu til móts við vélina.

Dönsk flugvél, sem var fyrst á vettvang þar sem talið er að Cessna-vélin hafi farið í hafið, tekur einnig þátt í leitinni.

Fiskibátar eru á leitarsvæðinu og varðskip og björgunarbátar eru á leið á slysstað. Önnur þyrla frá Landhelgisgæslunni er á leið á leitarsvæðið auk Fokker 50 vélar Gæslunnar.

Flugvélin, sem er skráð í Bandaríkjunum, var að koma frá Narsassuaq í Grænlandi til Reykjavíkur. Neyðarkall barst  á fjórða tímanum í dag og tilkynnti flugmaðurinn að drepist hefði á öðrum hreyflinum og hann ætti í erfiðleikum með að flytja eldsneyti á milli tanka.

Skömmu seinna barst frá honum tilkynning um að einnig hefði drepist á hinum hreyflinum og vélin svifi í um sjö þúsund feta hæð.

Vélin mun hafa verið á leið frá Grænlandi til Íslands.