Saklaust grín eða ferðamannafæla?

„Hér er húmornum alvarlega misbeitt,“ segir Styrmir Barkarson, íbúi í Reykjanesbæ, um umfjöllun um nokkra bæi landsins í blaði Iceland Express, Express yourself, sem dreift er til farþega.

„Þetta fólk vinnur við landkynningu og á að taka starf sitt alvarlega,“ segir hann.

Keflavík: borg flóttans

Greinin fjallar um sjö staði sem farið er um í hringferð um landið. Fyrsti viðkomustaður er Reykjavík, „borg óttans“ sem sögð er ógnvænleg í samanburði við aðra staði á landinu. Akureyri fær viðurnefnið „borg táranna“ og sagt óhjákvæmilegt að bresta í grát þegar þangað sé komið því „ef enn hefur ekkert slæmt gerst ertu ekki að taka þessa hringferð nógu alvarlega“.

Það er umfjöllunin um Keflavík sem fer sérstaklega fyrir brjóstið á Styrmi. Keflavík fær nafnið „borg flóttans“ (e. City of Get Me Out of Here) og er íbúafjöldi ekki tiltekinn heldur tekið fram að íbúum fækki ört. Þá segir að þó flestir heimsæki bæinn vegna flugvallarins sé „í þessu fiskiþorpi hópur einarðra íbúa sem glaðir hafna stórborgarglysinu fyrir „sveitaljóma“ Keflavíkur“.

Styrmir óttast að ferðamenn taki umfjöllunina alvarlega. „Maður veit það bara sem vanur ferðamaður að ferðamenn fara alveg eftir því sem sagt er í svona bæklingum. Og Reykjanesbær á svo mikið í húfi. Við erum rétt við flugvöllinn en það fara allir framhjá okkur,“ segir hann.

Verða nærgætnari næst

Lára Ómarsdóttir, upplýsingafulltrúi Iceland Express, segir augljóst að umfjöllunin hafi verið meint sem grín.

„En auðvitað er þetta mjög kaldhæðinn húmor sem á ekki endilega heima í svona blaði,“ segir hún.

Lára bendir á að þó hálft ár sé liðið frá útgáfu blaðsins, sem næst kemur út í september, hafi enginn kvartað vegna málsins.

„Ég er ekki enn farin að skoða efni næsta blaðs en við verðum nærgætnari næst. Ég mun lesa efnið vandlega yfir svo að það fari nú ekki fyrir brjóstið á neinum,“ segir hún.

Í hnotskurn

Í greininni er ein málsgrein um hvern stað og fjallað um Reykjavík, Borgarnes, Akureyri, Egilsstaði, Höfn, Vík í Mýrdal og Keflavík. Hver staður fær viðurnefni og ríma þau öll. Þannig er Borgarnes borg nándarinnar, eða City of Near, og Vík kölluð bjórborgin, eða City of Beer. Höfundur er Íri sem hefur búið hérlendis í tvö ár.