„Það hefur ranglega verið haft eftir mér að mér lítist mjög illa á vinningstillöguna,“ segir Ólafur F. Magnússon borgarstjóri um fyrirhugaða byggingu Listaháskóla Íslands (LHÍ) á svokölluðum Frakkastígsreit í miðbæ Reykjavíkur. „Hún þarf hinsvegar að laga sig að þeim kröfum sem borgin gerir til götumyndar Laugavegarins.“

„Okkur er mjög annt um að fá þessa starfsemi í miðborgina, teljum að hún styrki og efli svæðið og mannlífið þar. Þó er það alveg skýrt af hálfu meirihlutans í Reykjavík að við ætlum að vernda gamla götumynd Laugavegarins enda er það eitt af aðalatriðunum í okkar málefnasamningi.“ Ólafur segir að stuðning sé að finna innan minnihlutans í borgarstjórn við að varðveita götumynd svæðisins og telur hann mögulegt að samræma tillöguna betur götumyndinni. Að sögn Ólafs er næsta skref að skoða tillöguna vel í skipulagsráði borgarinnar. ylfa@mbl.is

Farið eftir ábendingum borgarinnar

Í yfirlýsingu sem borist hefur frá aðstandendum samkeppninnar um nýbyggingu Listaháskóla Íslands segir að efnt hafi verið til keppninnar með vitund og vilja borgaryfirvalda. Farið hafi verið eftir ábendingum skipulagsyfirvalda í einu og öllu í forsendum keppninnar.

„Aðstandendur samkeppninnar hafa átt í góðum samskiptum við skipulagsráð og treysta því að tillaga að breyttu deiliskipulagi fái faglega, málefnalega og ítarlega umfjöllun í ráðinu.“ Þá kemur fram að dómnefndin hafi tekið fullt tillit til sjónarmiða skipulagsyfirvalda í sinni vinnu en leitað var eftir tillögu sem upphæfi söguleg einkenni borgarhverfisins.

Í hnotskurn

» Vinningstillagan gerir ráð fyrir að Laugavegur 41 standi en hús nr. 43 og 45 víki. Ólafur vill að öll húsin annað hvort tengist nýja húsnæðinu með beinum hætti eða göngustígur væri lagður á milli.
» Ólafur segir vel hægt að samræma stefnu borgarstjórnar og þarfir LHÍ.