Héraðsdómur Norðurlands eystra. mbl.is/Skapti

Héraðsdómur Norðurlands eystra hefur dæmt 19 ára gamlan karlmann í sex mánaða skilorðsbundið fangelsi fyrir hættubrot en maðurinn setti gúmmíbolta upp í leggöng konu og skildi hann þar eftir án hennar vitneskju. Þremur vikum síðar var boltinn fjarlægður með skurðaðgerð en konan var þá komin með bólgur og alvarlega sýkingu. 

Pilturinn var dæmdur til að greiða stúlkunni 600 þúsund krónur í bætur. Hann var einnig ákærður og fundinn sekur um að hóta lögreglumönnum lífláti utan við veitingastað á Akureyri í haust.

Fram kemur í dómnum, að pilturinn og stúlkan hittust í júlí og fóru í kjölfarið heim til hennar og höfðu samfarir. Þau voru bæði drukkin. Pilturinn sagðist hafa teygt hendina niður á gólf og fundið þar boltann, sem hann setti síðan inn í leggöng stúlkunnnar. Stúlkan sagðist hafa talið að boltinn væri eitthvað kynlífsleikfang, sem pilturinn hefði síðan tekið út.

Boltinn var sýndur í réttinum en hann var tæpir 6 sentimetrar í þvermál. Læknir bar, að aðskotahlutur sem þessi í leggöngum geti valdið miklum móðurlífsbólgum og jafnvel dauða.  Stúlkan hafi svarað meðferð mjög vel og muni ekki hafa varanlegar líkamlegar afleiðingar. Hann tók fram að stúlkan hefði verið mjög undrandi þegar hann fann boltann en hún hefði áttað sig fljótt á því hvenær þetta hefði gerst. 

Dómurinn taldi að stúlkan ætti rétt til miskabóta úr hendi piltsins. Var litið til þess að stúlkan hafi orðið fyrir verulegum líkamlegum og andlegum þjáningum vegna verknaðar mannsins og um tíma mátt búa við það að hætta væri á að hún yrði ófrjó.