Gylfi Magnússon.

Viðskiptaráðuneytið segir í yfirlýsingu, að engin breyting hafi orðið á fyrirhuguðum stuðningi ríkisstjórnarinnar við hugsanlega málshöfðun skilanefnda Landsbankans og Kaupþings á hendur breska ríkinu. Þá hafi núverandi ríkisstjórn ekki breytt þeirri ákvörðun fyrri stjórnar að kanna möguleika á málshöfðun fyrir Mannréttindadómstóli Evrópu.

Breska blaðið Financial Times sagði í dag, að íslensk stjórnvöld hefðu lagt á hilluna áform um að höfða mál gegn breskum stjórnvöldum vegna hryðjuverkalaganna. Haft var eftir Gylfa Magnússyni, viðskiptaráðherra, að að engin áform séu af hálfu Íslands að leita til dómstóla vegna hryðjuverkalaga.

Yfirlýsing ráðuneytisins er eftirfarandi:

„Vegna umræðu um hugsanleg málaferli á hendur Bretum vegna aðgerða þeirra gegn íslenskum bönkum s.l. haust þá skal áréttað að engin breyting hefur orðið á fyrirhuguðum stuðningi ríkisstjórnarinnar við hugsanlega málshöfðun skilanefnda Landsbankans og Kaupþings á hendur breska ríkinu. Íslenska ríkið yrði hins vegar ekki beinn aðili að slíkum málum.

Fyrri ríkisstjórn fékk bresku lögmannsstofuna Lovells til að gefa álit á hugsanlegri málshöfðun íslenska ríkisins gegn breskum stjórnvöldum vegna aðgerða Breta. Að mati Lovells voru engar líkur á að slík málshöfðun myndi verða til þess að íslenska ríkinu yrðu dæmdar skaðabætur. Að fenginni þeirri niðurstöðu ákvað fyrri ríkisstjórn að höfða ekki mál gegn Bretum fyrir breskum dómstólum vegna þessa. Núverandi ríkisstjórn hefur ekki breytt þessari ákvörðun.

Fyrri ríkisstjórn ákvað jafnframt að kanna aðra möguleika til málshöfðunar, m.a. fyrir Mannréttindadómstól Evrópu. Núverandi ríkisstjórn hefur ekki breytt þeirri ákvörðun og enga ákvörðun tekið um að höfða slíkt mál fyrir þeim dómstóli eða öðrum.“