Héraðsdómur Suðurlands hefur sýknað ökumann á Selfossi af ákæru um að hafa ekið spólandi um bæinn. Hins vegar var hann dæmdur til greiðslu fyrir að hafa ekið án öryggisbeltis, nota farsíma án handfrjáls búnaðar við aksturinn og aka bifreið sinni án lögboðins skrásetningarnúmers að framan.

Ólafur Helgi Kjartansson, sýslumaður á Selfossi, sótti málið fyrir ákæruvaldið.

Í ákærunni segir svo um meinta spólun: „Samkvæmt frumskýrslu lögreglu var lögreglumaðurinn (S) við umferðareftirlit skömmu eftir miðnætti þegar hann varð var við bifreiðina (P). Kemur fram að ökumaður bifreiðarinnar hafi gert sér að leik að spóla vestur eftir Austurveginum, frá Tryggvagötu og í átt að Sigtúni. Þessu hafi fylgt töluverður hávaði og dekkjavæl. Dimmt hafi verið, rigning og gatan blaut. Fremur lítil umferð hafi verið um götuna á þessum tíma. Kemur fram að lögreglumaðurinn hafi veitt bifreiðinni eftirför og að ökumaðurinn hafi stöðvað eftir að honum hafi verið gefið stöðvunarmerki. Kemur fram í vettvangsskýrslu að ökumaðurinn hafi ekki viljað tjá sig um hið meinta brot.“

Ákærði neitaði fyrir dómi því sem fram kom hjá lögreglumanninum að hann hefði umrætt sinn ekið spólandi vestur Austurveg með tilheyrandi hávaða og dekkjavæli. Í dómsorði segir: „Engin önnur vitni voru að meintri háttsemi ákærða. Atvikið náðist heldur ekki í upptöku á svokölluðum Eye-witness-búnaði lögreglubifreiðarinnar né er framburður lögreglumannsins studdur öðrum gögnum. Stendur því staðhæfing gegn staðhæfingu um það hvernig atvik voru að þessu leyti. Samkvæmt því þykir sönnun ekki liggja fyrir um brot ákærða og ber því að sýkna hann af þessum lið ákærunnar.“