Umræða um lægra raforkuverð til garðyrkjubænda snýst fyrst og fremst um niðurgreiðslur úr ríkissjóði,“ segir í yfirlýsingu frá Samorku, samtökum orku- og veitufyrirtækja á Íslandi. Þá segir að engar viðskiptalegar forsendur séu fyrir samanburði á orkuverði til garðyrkjubænda og stóriðju.

Í yfirlýsingu Samorku segir að undanfarna daga hafi heyrst krafa um að garðyrkjubændur fái keypta raforku á sama verði og stóriðjan. Garðyrkjubændur séu góðir viðskiptavinir orkufyrirtækja. Engu að síður sé þessi samanburður þannig að sæmilega stór garðyrkjubóndi kaupi ekki einn þúsundasta af því orkumagni sem meðalstórt álver kaupir.

Stóriðjan kaupi raforkuna í 24 klukkustundir á sólarhring og 365 daga á ári, alls um 8.760 klukkustundir á ári, skuldbundið til margra ára og jafnvel til áratuga. Garðyrkjubændur undirgangist engar slíkar skuldbindingar. Þeir noti gjarnan raforku til lýsingar í um 5.500 klukkustundir á ári.

Í yfirlýsingu Samorku segir að raforku þurfi að nota jafnóðum og hún er framleidd. Þess vegna séu mikil verðmæti í þessum stóru sölusamningum við stóriðjufyrirtækin. Dreifingin sé gjarnan um þriðjungur af raforkuverði til fyrirtækja og heimila. Stóriðjan taki við orkunni beint af flutningskerfinu og greiði því sjálf dreifingarkostnaðinn.

„Garðyrkjubændur hafa aftur á móti notið niðurgreiðslu úr ríkissjóði á dreifingunni, en nýleg ákvörðun um lækkun þeirrar niðurgreiðslu hefur verið gagnrýnd af þeirra hálfu. Umræðan um lægra raforkuverð til garðyrkjubænda er fyrst og fremst umræða um frekari og/eða áframhaldandi niðurgreiðslur á raforku til þeirra, úr ríkissjóði, og þannig hefur hún enda verið ágætlega sett fram af hálfu talsmanna garðyrkjubænda. Engar viðskiptalegar forsendur eru fyrir þessum algenga samanburði við stóriðjuna, sem heyrist svo víða annars staðar,“ segir í yfirlýsingu Samorku.