Ráðgjafarstofa um fjármál heimilanna mbl.is/Ómar

Ríkisstjórnin hefur samþykkt tillögu Ástu R. Jóhannesdóttur, félags- og tryggingamálaráðherra, um að stórefla Ráðgjafarstofu um fjármál heimilanna með því að tvöfalda starfsemi hennar og opna nýja starfsstöð.

Miðað er við að 8–10 starfsmenn starfi á nýrri starfsstöð við Sóltún 26 en þar getur fólk gengið inn af götunni og fengið fyrstu aðstoð frá ráðgjafa. Ráðgjafarstofan í Sóltúni verður opnuð í næstu viku.

Fjórum stöðugildum verður einnig bætt við starfsstöð stofunnar að Hverfisgötu 6. Fjölgun starfsfólks að Hverfisgötu 6 mun stuðla að því að stytta biðtíma þeirra sem bíða eftir ráðgjöf. Ráðgjafarstofan annaði eftirspurn þangað til nú í apríl þegar aðsókn þrefaldaðist. Miðað er við að unnt verði að vinna á biðlistanum á næstu fjórum vikum.

Starfsstöðin í Sóltúni er sett á laggirnar tímabundið til þriggja mánaða en þá verður þörfin metin á áframhaldandi starfsemi. Efling Ráðgjafarstofunnar er gerð í samstarfi þeirra sem koma að rekstri hennar, þar á meðal Íbúðalánasjóðs, Reykjavíkurborgar og Nýja Kaupþings banka, Íslandsbanka, Landsbanka og Sambands íslenskra sparisjóða. Reykjavíkurborg og bankarnir leggja til einn til þrjá starfsmenn hver sem verða tímabundið starfsmenn Ráðgjafarstofunnar. Einnig verða ráðnir starfsmenn af atvinnuleysisskrá. Bankarnir leggja til húsnæði, skrifstofubúnað og tölvur.