Óhóflegur dráttur

Dregist hefur úr hófi að ganga frá skiptum þrotabús Einars Guðfinnssonar hf. í Bolungarvík, að sögn skiptastjóra búsins, Páls Arnórs Pálssonar.

„Síðustu árin hefur framtaksleysi okkar því miður valdið töfum á frágangi búsins,“ segir hann. Fyrstu árin hafi málarekstur, þ. á m. vegna riftunarkrafna, verið nokkur. Þá hafi þetta bú verið eitt það fyrsta sem tekið var til skipta eftir breytingar á gjaldþrotalögum, sem hafi flækt úrlausnina.

Segir hann að sýslumaður og héraðsdómur hafi nú rekið á eftir því að skiptum ljúki og búast megi við að það gerist á næstu mánuðum. Segir hann að útlit sé fyrir að forgangskröfur fáist allar greiddar og veðkröfur að mestu, en almennar kröfur fáist hins vegar ekki greiddar nema að litlu leyti.