Fundarsalur Alþingis. mbl.is/Kristinn

Meirihluti þingmanna greiddi atkvæði með 1. grein frumvarps um ríkisábyrgð vegna Icesave-skuldbindinganna eftir 2. umræðu um málið í dag. Fer frumvarpið nú til meðferðar hjá fjárlaganefnd þingsins en ekki er ljóst hvenær það kemur til 3. og síðustu umræðu á Alþingi.

Alls greiddu 32 þingmenn atkvæði með frumvarpsgreininni, allir viðstaddir þingmenn Samfylkingarinnar og allir þingmenn VG nema tveir, Lilja Mósesdóttir og Ögmundur Jónasson. Þá greiddi Þráinn Bertelsson, óháður þingmaður, atkvæði með frumvarpsgreininni. 29 þingmenn stjórnarandstöðunnar greiddu atkvæði gegn frumvarpinu auk Lilju og Ögmundar en tveir þingmenn voru fjarverandi.

Þau Lilja, Ögmundur og Ásmundur Einar Daðason sátu síðan hjá þegar atkvæði voru greidd um 2. grein frumvarpsins en Ásmundur Einar sagði, þegar hann gerði grein fyrir atkvæði sínu um 1. grein frumvarpsins, að þótt hann féllist á að frumvarpið fari til meðferðar í fjárlaganefnd myndi endanleg afstaða hans til málsins byggjast á niðurstöðunni þar. Hann greiddi síðan, eins og Lilja og Ögmundur, atkvæði gegn 5. og síðustu grein frumvarpsins um að það tæki þegar gildi og var sú frumvarpsgrein var samþykkt með 31 atkvæði gegn 30.

Þungar byrðar en við getum borið þær

Atkvæðagreiðslan tók langan tíma og margir þingmenn gerðu grein fyrir atkvæði sínu. Til dæmis sagði Valgerður Bjarnadóttir, þingmaður Samfylkingarinnar, þegar hún greiddi atkvæði um 1. grein frumvarpsins, að líkja mætti þessu máli við harmleik. Í 1. þætti hefðu ráðamenn selt vinum sínum bankana fyrir slikk, mönnum sem kunnu ekkert fyrir sér í bankastarfsemi. Í 2. þætti hafi allt leikið í lyndi, í 3. þætti hafi þeir sem kunnu að reka banka ekki lengur viljað lána íslensku bönkunum. Þá hefðu menn fundið upp á Icesave-reikningunum, „þeirri tæru snilld og nörruðu þannig peninga út úr fólki í útlöndum."  Í fjórða þætti verði íslensk þjóð að taka ábyrgð á óreiðumönnum en ella einangrist hún pólitískt og efnahagslega.

„Þetta verða þungar byrðar en við munum geta borið þær," sagði Valgerður.

Framtíðin mun dæma ykkur

Tryggvi Þór Herbertsson, þingmaður Sjálfstæðisflokks, sagði í atkvæðagreiðslunni, að þetta mál snérist um að Íslendingar undirgangist ábyrgð upp á 750 milljarða króna. Það sé kaldhæðni örlaganna, að fyrsti gjalddagi lánsins yrði árið 2016, sama ár og greiða verði barnalánið svonefnda, sem Alþýðubandalagið tók á sínum tíma þegar það réði fjármálaráðuneytinu og bæri nú 15% vexti. 

Tryggvi sagði ljóst, að stjórnarliðar greiddu atkvæði á tveimur forsendum, annars vegar hollustu við flokk sinn og hins vegar hatri á Sjálfstæðisflokknum.  „Forsendurnar, sem ykkur hafa verið gefnar eru hálfsannleikur og lygi, ábyrgð ykkar er mikil og framtíðin mun dæma ykkur," sagði Tryggvi Þór.