Golli / Kjartan Þorbjörnsson

Fjármálafyrirtæki verður óheimilt að gera starfslokasamning við framkvæmdastjóra eða annan lykilstarfsmann nema hagnaður hafi verið af rekstri fyrirtækisins samfellt síðustu þrjú ár starfstíma hans. Þetta er meðal ákvæða í nýju lagafrumvarpi, sem viðskiptaráðherra hefur lagt fram um fjármálafyrirtæki.

Frumvarpinu er ætlað að taka á ýmsum ákvæðum núgildandi laga um fjármálafyrirtæki sem talið er að hafi átt sinn þátt í fjármálahruninu sl. haust.  

Í frumvarpinu eru lagðar til breytingar sem hafa það að markmiði að bæta innlent regluverk á sviði fjármálamarkaðar í þeim tilgangi að koma í veg fyrir að sambærilegir erfiðleikar endurtaki sig.

Helstu breytingar og nýmæli frumvarpsins eru eftirfarandi:

• Lagt er til bann við lánveitingum með veði í eigin hlutabréfum eða stofnbréfum.
• Þröngar skorður eru settar við lánveitingum til stjórnarmanna, framkvæmdastjóra og lykilstarfsmanna.
• Settar eru reglur um hvernig standa má að hvatakerfum, kaupaukakerfum, og starfslokasamningum.
• Gerðar eru auknar kröfur til stjórnarmanna, ábyrgð þeirra á eftirliti með rekstri aukin og bann sett við starfandi stjórnarformönnum.
• Skerpt er á ákvæðum um heilbrigða og eðlilega viðskiptahætti auk þess sem eftirlitsheimildir Fjármálaeftirlitsins eru auknar.
• Settar eru reglur um viðskipti starfsmanna fjármálafyrirtækja auk þess sem aukið er á ábyrgð og hlutverk innri eftirlitsdeilda og áhættustýringar.