Veðrið var hálf hryssingslegt þegar einn af fossum Eimskips sigldi frá Vestmannaeyjum í dag. mbl.is/Sigurgeir

Björgunarsveitir um landið sunnan- og suðvestanvert hafa haft í ýmsu að snúast í óveðrinu sem nú gengur yfir landið. Skv. upplýsingum frá lögreglu og Slysavarnafélaginu Landsbjörgu eru flest verkefnin minniháttar, s.s. að festa niður þakplötur sem hafa losnað. 

Nú í kvöld var björgunarsveitin í Skeiða- og Gnúpverjahreppi kölluð út vegna hlöðu sem hafði fokið í hvassviðrinu.

Lögreglan í Vestmannaeyjum segir að veðrið sé nú að ganga niður, en þar er hins vegar mikil úrkoma. Að sögn lögreglunnar á Akureyri er farið að bæta í vind fyrir norðan, en allt hefur hins vegar gengið áfallalaust fyrir sig.

Björgunarsveitin Suðurnes var m.a. kölluð út í dag vegna foks við Officeraklúbbinn á vallarsvæðinu í Keflavík. Þá var björgunarsveitin Þorbjörn í Grindavík verið kölluð út vegna foks í bænum. Þar  var þak að fjúka af íbúðarhúsi og þak fauk af fjárhúsi, bárujárnsstafli fór af stað og nokkur skilti í bænum.

Þá hafa björgunarsveitir einnig verið kallaðar út á höfuðborgarsvæðinu og í Mosfellsbæ hafa eltst við skjólveggi, klæðningar, vinnuskúra og vinnupalla.   Þakplötur fuku m.a. af Hótel Rangá og á Selfossi fauk þakgluggi upp. Á Akranesi glímdi björgunarsveitin við fjúkandi girðingu og fleira smálegt og björgunarsveitir á höfuðborgarsvæðinu.

Talsvert af spýtnabraki fór af stað á Patreksfirði og ógnaði þar öryggi vegfarenda og verðmætum. Sá björgunarsveit um að fergja það sem ekki var farið af stað og tína saman afganginn.