Rannsóknarnefnd fari yfir stjórnsýslu í Kópavogi

Áheyrnarfulltrúi Vinstri grænna í bæjarráði Kópavogs vill að fimm manna nefnd óháðra sérfræðinga rannsaki aðdraganda, orsakir og afleiðingar efnahagshrunsins á bæjarfélagið og fjárhag þess. Tillagan var flutt í bæjarráði í dag en afgreiðslu hennar frestað til næsta fundar.

Í tillögunni segir að rannsóknarnefndin eigi að kanna:

• Stjórnsýslu bæjarins og aðkomu stjórnmálamanna að fjárhagslegum ákvörðunum á undanförnum árum.

• Hvort einstakir aðilar, s.s. verktakar, bankar og fyrirtækjasamsteypur hafi fengið óeðlilega fyrirgreiðslu.

• Hvort fjársterkir aðilar hafi beint eða óbeint haft áhrif á pólitískar og stjórnsýslulegar ákvarðanir.

• Hvort fjársterkir aðilar hafi hagnast á tengslum við bæinn og einstaka embættismenn eða bæjarfulltrúa.

• Hvort einstakir embættismenn, bæjarfulltrúar eða frambjóðendur til bæjarstjórnar hafi hagnýtt sér persónulega eða í þágu síns flokks tengsl við fjársterka aðila sem átt hafa í viðskiptum við bæjarfélagið.
  

Auk þess á nefndin að koma með ábendingar og tillögur að breytingum á lögum, reglum, vinnubrögðum og skipulagi stjórnsýslu bæjarins.

Verði tillagan samþykkt á rannsóknarnefndin að skila niðurstöðum sínum fyrir 31. ágúst nk.

• 3 blogg um fréttina

Bloggað um fréttina

• Jóhannes Ragnarsson: Einkavinavæðinguna í VG verður líka að rannsaka, eða hvað?
• Magnús Helgi Björgvinsson: Gott framtak hjá Ólafi Þór!
• Árni Davíðsson: Spilltasta sveitarfélag landsins?