Mótmælt við Stjórnarráðið

Hópur fólks var við Stjórnarráðið þegar ríkisstjórnarfundur hófst þar í morgun. Vill fólkið með þessu lýsa andstöðu við tilmæli um að vextir gengislána miðist við vexti Seðlabankans en ekki samningsvexti. 

Þá hefur verið boðað til mótmæla við Seðlabankann klukkan 12 í dag. Þar voru mótmælaaðgerðir um hádegisbil í gær. Talið er að hátt í 500 manns hafi tekið þátt í mótmælunum þá og var blásið í vúvúsela, búsáhöldum klingt og reynt að þvinga upp hurð Seðlabankans.

Einn var handtekinn eftir að hafa neitað að hlýða fyrirmælum lögreglu, sem greip inn í þegar fólkið var byrjað að bera eldsmat að aðalinngangi bankans og farið að skvetta á hann vökva. „Þetta leit út eins og bálköstur,“ segir Arnar Rúnar Marteinsson, aðalvarðstjóri hjá lögreglunni á höfuðborgarsvæðinu. Þá taldi lögregla sér ekki lengur til setunnar boðið. Að sögn mótmælenda var lögregla harðhent.

• 3 blogg um fréttina

Bloggað um fréttina

• Gísli Foster Hjartarson: Von á fjölmenni
• Ólafur Ingi Hrólfsson: Deponering
• Guðrún Soffía Gísladóttir: Dröslumst nú niður að Seðlabanka í hádeginu!