Flest benti til þess í gærkvöld að þingsályktunartillaga meirihluta þingmannanefndar þeirrar sem kennd er við Atla Gíslason, þingmann VG, yrði felld við atkvæðagreiðslu þingsins sem væntanlega fer fram í dag.
Þó var talið að ef meirihluti þingflokks Samfylkingar myndi kjósa með því að Geir H. Haarde yrði ákærður yrðu hinir þrír fyrrverandi ráðherrarnir einnig ákærðir.
Ráherrarnir fyrrverandi sem um ræðir eru auk Geirs, þau Ingibjörg Sólrún Gísladóttir, fyrrverandi utanríkisráðherra, Árni M. Mathiesen, fyrrverandi fjármálaráðherra, og Björgvin G. Sigurðsson, fyrrverandi banka- og viðskiptaráðherra.Allur þingflokkur Sjálfstæðisflokksins er andvígur ákærum á hendur ráðherrunum fyrrverandi. Sama máli er talið gilda um yfir helming þingflokks Samfylkingarinnar og Framsóknarflokks, þannig að öll atkvæði VG og Hreyfingarinnar megi sín lítils, að því er fram kemur í umfjöllun um þessi mál í Morgunblaðinu í dag.