Ekkert boð komið
Jóhanna Sigurðardóttir, forsætisráðherra, hefur ekki haft samband við þingmenn Hreyfingarinnar né heldur formann Sjálfstæðisflokksins um að ræða stöðuna í þjóðfélaginu í ljósi fjöldamótmælanna í gærkvöldi líkt og forsætisráðherra boðaði í gærkvöldi.
Ekki hefur náðst í formann Framsóknarflokksins, Sigmund Davíð Gunnlaugsson.
Bjarni Benediktsson, formaður Sjálfstæðisflokksins, segist vera þeirrar skoðunar að ríkisstjórnin verði að gera sér grein fyrir því að hún geti ekki haldið áfram. „Ég tel að það sé fyrsta skrefið," segir Bjarni í samtali við mbl.is.
Þór Saari, þingmaður Hreyfingarinnar, á ekki von á öðru en áfram verði mótmælt í dag.
Þór segir að Jóhanna og Steingrímur J. Sigfússon, fjármálaráðherra, þurfi væntanlega að ræða málin sín á milli áður en þau ræða við formenn annarra flokka.
„Við höfum boðið þeim upp á samstarf alveg frá fyrsta degi fyrir einu og hálfu ári síðan en það hefur ekki verið neinn áhugi fyrir því. Þau eru mjög ráðrík og það verður mjög erfitt fyrir þau að gefa eftir af sinni stefnu sem þau hafa fylgt af miklu harðfylgi."
Að sögn Þórs kemur vonandi eitthvað út úr viðræðum flokkanna enda verði eitthvað að gerast. Hann segist hafa farið út á Austurvöll eftir að þingfundi lauk í gærkvöldi og rætt við ansi marga mótmælendur.
„Þau sögðust ætla að mæta aftur klukkan 14 í dag og halda áfram þar til ríkisstjórnin er farin og boðað verður til kosninga. Það var tónninn sem ég heyrði og ég er einfaldlega sammála því. Því þetta fólk sem er inni á þingi hefur brugðist. Mér finnst eftir að skýrsla rannsóknarnefndarinnar kom út og niðurstaða atkvæðagreiðslu um ráðherraábyrgðina og skýrslu þingmannanefndarinnar sé ástæða til að almenningur fái að segja álit sitt á svoleiðis stjórnarfari," segir Þór.
Unnið hefur verið hreinsun á Alþingishúsinu og Austurvelli í morgun.Talið er að um sjö þúsund manns hafi tekið þátt í mótmælum í gærkvöldi og var eggjum, málningu, golfkúlum, glerflöskum og fleiru kastað að alþingishúsinu.
