Gagnrýna eldsneytisverðhækkanir

Neytendasamtökin vilja að olíufélögin lækki nú þegar verð á bensíni og olíu en öll félögin hækkuðu verð í gær.  Ef olíufélögin telja sér ekki fært að verða við því ætlast Neytendasamtökin til að þau rökstyðji hækkanir sínar og hverjar séu ástæður þeirra. Fjölmargir hafa haft samband við Neytendasamtökin vegna verðhækkana olíufélaganna, að því er segir á vef samtakanna.

Félag íslenskra bifreiðaeigenda fjallar einnig um eldneytisverðhækkanir á sínum vef í dag.

„Olís, Shell og N1 hækkuðu bensín og dísilolíuverð í gær. Öll hækkuðu þau dísilolíulítrann um 2 krónur. N1 og Olís hækkuðu bensínlítrann einnig um 2 krónur en Shell hækkaði svokallað V-Power bensín um 1,50 krónur á lítra. Eftir hækkun er algengasta verð á bensíni hjá Olís og N1 í sjálfsafgreiðslu 200,60 krónur á lítra og sama verð á dísilolíunni eða 200,60 krónur á lítra.

Hækkunina í gær er ekki hægt að réttlæta með tilvísun í heimsmarkaðsverð eða gengisþróun því að í gær lækkaði kostnaðarverð á dísilolíu um rúmlega eina krónu en bensínlítrinn hækkaði um ríflega 10 aura. Þessu til viðbótar þá lækkaði hráolía á Brent markaðnum (okkar markaðssvæði) um 1,5 dollara í gær og hefur lækkað um yfir 50 sent það sem af er deginum í dag þegar þessi frétt er skrifuð. 


Eina skýringin á hækkuninni í gær er því sú ein og aðeins ein:  Olíufélögin N1, Olís og Shell eru að bæta í álagningu sína á eldsneytinu, bæði bensíni og dísilolíu," segir á vef FÍB.

• 4 blogg um fréttina

Bloggað um fréttina

• Montyus Python: Ástæða bensínhækkunar hjá okkar Olíukóngum
• Jón Rúnar Ipsen: legg til að fólk hætti að versla við olis og …
• Sigurður Haraldsson: Er einhver sem gagnrýnir ekki?
• Haraldur Haraldsson: Gagnrýna eldsneytisverðhækkanir/maður var að segja þetta í gær !!!!!