Bilun varð í vél Iceland Express
á leið frá Berlín til Keflavíkur síðdegis í gær og tefst heimför
flugfarþega þar um sólarhring af þeim sökum. Að sögn Kristínar
Þorsteinsdóttur upplýsingafulltrúa Iceland Express
kviknaði viðvörunarljós í mælaborði í flugstjórnarklefa og var því
ákveðið að vélin skyldi gangast undir hefðbundið eftirlit áður en henni
yrði hleypt í loftið.
Farþegar
voru fluttir á nærliggjandi hótel þar sem þeir gistu í nótt.
Morgunblaðið heyrði frá einum farþeganna að flugvélin sem bilaði sé mjög
gömul. Kristín segir að svo sé ekki og flugvélafloti Iceland Express sé yfir höfuð ekki sérlega gamall.
Vegna
tafa sem urðu í Danmörku í gær, en þar gat vél ekki lent í
Kaupmannahöfn vegna veðurs og þurfti því að fljúga til Billund, og
einnig vegna tafa í Lundúnaflugi, ákvað Iceland Express
að taka aukavél á leigu til að lágmarka röskun á flugáætluninni. Áætlað
er að farþegarnir sem enn sitja fastir í Berlín lendi á Íslandi um
klukkan 14 í dag.