Siglufjarðarvegur er ófær vegna snjóflóða. Að sögn Vegagerðarinnar verður ekki reynt að opna veginn þar í kvöld.
Lögreglan í Fjallabyggð er á leiðinni á vettvang til að kanna aðstæður en að hennar sögn sakaði engan. Flóðið var ekki mikið en þó nægilega stórt til þess að loka veginum. Hvöss suðvestan átt er nú á þessum slóðum og verður beðið með að opna veginn þar til lægir.
Veðurstofan gerir ráð fyrir samfelldri
snjókomu í um tvær til þrjár klukkustundir undir kvöld vestan og suðvestanlands. Einnig á Suðurlandi síðar í kvöld. Vindur verður hægur til að byrja með en síðar
gengur í vestan hvassviðri suðvestanlands og austur með suðurströndinni, og þá
með talsverðum skafrenningi og takmörkuðu skyggni. Á Norðurlandi fer
veður versnandi, s.s. á Öxnadalsheiði með nokkuð hvassri suðvestanátt.
Það eru hálkublettir í Þrengslunum en Hellisheiðin er auð sem og Hringvegurinn austur eftir Suðurlandi. Hins vegar er víða hálka á öðrum vegum á Suðurlandi, jafnvel þæfingsfærð á fáeinum útvegum.
Á Vesturlandi og Vestfjörðum er víðast hvar nokkur hálka eða snjóþekja og sumstaðar skafrenningur.
Hálka eða snjóþekja er á velflestum vegum á Norðurlandi og víða skafrenningur eða ofankoma.
Á Austurlandi eru hálkublettir á flestum vegum en þó hálka og skafrenningur á Fjarðarheiði. Vegir eru auðir á Suðausturlandi.